4. Qofka Islaamka ahi af kale amaba luqad kale oo aan carabi ahayn ma ku tukan karaa? Jiho kaleeto oo aan Makka ahaynse ma u jeesan karaa marka uu tukanayo?

Jawaab:

Luqaddu waa isku xire, waxaana ka mid ah hagaajintii uu hagaajiyay islaamku muslimiinta diin ahaan iyo bulsho ahaanba inuu ka dhigay luqadda guud ee diinta mid ay ku mideysan yihiin muslimiintu, oo Islaamka la'aantii luqadda carabigu ma waarteen oo sida luqadaha kaleba u dhalan rogmeen ayay u beddelmi lahayd.

Sidoo kale haddaanu carabigu jirin fahamka diinta ayaa lugu kala fogaan lahaa oo waxaa la noqon lahaa diimo kala duwan oo midba midda kale gaalnimo ku xukumayso.

Luqadda Carabiguna kuma gaar ahan dadka ka soo farcamay odaygii Yacrub ibnu qaxdaan ahaa ee waa luqad muslimiinta ka dhexeysa.

Qofkuna sidii la rabay Islaamka uguma adeegi karo haddanu Carabiga aqoon u lahayn.

Naxwaha Carabiga waxaa looga dambeeyaa nin persian (reer faaris) ahaa oo lagu magacaabi jiray Siibawayhi.

Cilmiga Xadiithkana waxaa looga dambeeyaa Bukhaari oo aan isaguna carab u dhalan.

Taa waxay ku gaareen niyad wanaaggoodii iyo cilmigii oo ay waddadii saxda ahayd u mareen, mana gelin casabiyad isir oo ma aanay dhihin maxaa diintu luqaddeenna ugu soo degi weyday.

Kolley luqad uunbaa la dooran lahaa, Carabigii bayna noqotay, waana luqad mudan inay islaamkii xambaarto, sababta oo ah waxay kulansatay aftahannimo iyo mug weyni.

Qolo unbaana diinta billowga hore ka qaadan lahayd Rasuulka, Carab bayna noqdeen, iyaguna dadka diinta way sii gaarsiiyeen, qolooyinkii u baahday in wax loo tarjumana waa loo tarjamay, ummada kale oo badanna carabigii bay barteen oo luqadoodii noqday.

Haddaan u soo noqonno su'aashii: Culimada islaamku waxay isku waafaqsan yihiin in quraanka Carabi lugu aqriyo, adkaarta salaadduna ay carabi ahaato, salaadduna af kale kuma ansaxeyso.

Allana dadka kuma kallifin waxaanay awoodin oo haddii ay daruuro timaaddo Xukum gaar ah ayay leedahay.

Kacbada in loo jeedsado Allaa quraanka nugu amray oo yiri: Meel kastood joogtaan kacbada dhinaceeda u jeesta, arrin doordoorasho aan u leennahay ma ahan ee waa cibaado, qofku hadduu xorriyaddaa isi siiyo waa nin iska ciyaaraya, haddaanu aqbalin amarka Alle oo uu ka horyimaado islaannimada waa uu ka xarig furtay.

Marka walaalayaal Xaasidnimo aan dad xasdayno iyo isla weyni yaannaan diinteennii ku waayin, diintan qofi nagama xigto, sharfteennuna iyaday ku jirtaa, waana mid aannu ugu dhowaanayno Allihi na abuurtay ee na lahaa.

Sheydaankuna cadow buu noo yahay oo wuxuu isku deyayaa sidii uu naarta noogu jiidan lahaa, marka aynu ka foojignaanno.

Bogga Hore