6. Maxaa keenay inay dadka iyo dowladaha muslimiinta ahi dhammaantood ay aad uga cabsadaan, oo ay khatar u arkaan inay isku xukumaan oo ay dastuur ka dhigtaan shareecada islaamka tiiyoo ay hadana dhinaca kale rumeysanyihiin inay shareecadu tahay qowlkii Eebbe?

Jawaab:

Waxaan shaki ku jirin in isticmaarki dowladaha Muslimiinta gumeysan jiray uu aad uga shaqeeyey sidii looga fogaan lahaa sharciga Alle in la isku dhaqo, wuxuu is bahaysi la sameysan jiray dad aan diinta ku fiicnayn oo laga caqiiddo fiican yahay iyagaasuuna dowladnimadii ku wareejiyey, waxaana yar dal arrintaa ka badbaaday.

Waxaana ku waajib ah qof kasta oo muslim ah inuu amarka Alle u hoggaansamo oo wixii Alle rumee uu yiraana uu rumeeyo wixii samee la yiraahdana uu aqbalo oo uu sameeyo ama madax ha noqdo ama dadweynee, madaxdase xil gaar ah baa sii saaran awoodda Alla siiyay darteed, waxaa laga rabaa inay munkarka inkiraan macruufkana dadka faraan, waxaana taa ka mid ah inay xudduuddii oogaan Alla markaa waa u naxariisanayaa oo haddii ay caddaalad dadka ku dhaqaan diintoodana ilaaliyaan Alle waa uu jeclaadaa raallina ka noqdaa qalbiga dadkana u soo jeediyaa oo dadkii baa Alle jecleysiiyaa markaasaa arrimuhu u fududaadaan haddii qasadkiisu wanaagsan yahay. Haddii kalese oo dantiisu tahay xoolo hel awooddaadana muuji dadkana istus Alle dadkuu ku diraa oo arrintaa waa lugu cadaabaa, waxaana aan ka hadleynaa qaddar ahaan ee ninka muslimka ah ee madaxda ah in lala dagaallamo sharcigu ma oggola, waxaa waajib ah in loo dulqaato haddaanu gaalnima cad la imaan amaba aanu salaadda ka tegin.

Hadduu xukumka Alle wax ku xukumi waayo qofka muslimka ahi isagoo aamminsan waxa uu samaynayo inay xaaraan tahay, aamminsanna, iltizaamsanna, aqbalsanna inay waajib ku tahay inuu xukumka Alle wax ku xukumo, laakiin uga tegay laaluush uu qaatay iyo wax la mid ah waa nin dambi aad u weyn ku dhacay laakiin diintuu ka baxay lama dhihi karo, oo waxaa jira dambiyo gaalnimo diintu ku sheegtay, haddana aan diinta looga baxayn, oo ahlusunnuhu waxay isu soo ururiyaan nusuusta dhinacyadeeda, ee hal dhinac uun kuma dhegaan, nusuusta dambiyada ka hadleysa waxaa hal il ku fiiriyay Khawaarijta iyo Murji'ada .

Meeshan aad leedahay (dadka iyo dowladaha muslimiinta ah dhammaantood) run kuma aadan sheegin, maadigaa afti ka qaaday oo soo xaqiiqsaday arrintaas. sidaa si ka duwan ayaan ognahay oo ah in qof kasta oo muslim ah uu jecel yahay in xukumka Alle wax lugu xukumo oo islaamnimadiisaa keenaysa sidaas, haddii hawo ka qaalib noqoto oo uu ku dhaqmi waayo sharciga wuxuu rumeysan yahay in uu sharcigiisii yahay.

Rasuulkeennu wuxuu noo sheegay : ((in bani'aadan oo dhammi uu gefaayo, waxaana dadkaa ugu wanaagsan kuwa Allaah u soo noqda))

Haddii la yiraa dadkii dambi ku dhaca diintay ka baxayaan oo naartay ku waarayaan taasi sow macneheedu ma ahan inaanay markii horeba diinka soo gelin baa u wanaagsanayd. Hadalkii uu baadil ka dhasho isaguna waa baadil.

Meesha aad leedahay (shareecadu waa qowlki Eebbe ) iska sax. shareecadu(Quraanka iyo Xadiithku) waa waxyi Alle soo dejiyey labaduba, laakiin Axaadiithtu waa waxyi xagga macnaha ah, waxaana ku hadlay Rasuulkeenna .

Bogga Hore