8. Maxaa dumarka islaamka ah loogu sameeyey irid gooni ah oo ay masaajidka ka soo galaan oo ay kana baxaan marka ay tukanayaan, maxay tahay sababta in muuqaalkooda la arkaa ay denbi u tahay amaba loo qarinayaa?

Jawaab:

Waxa albaabka gaarka ah loogu sameeyey waxay tahay inaanu is taaban jirka dad aan isu xalaal ahayn, iyo iyadoo sharaftooda la dhowrayo. Rasuulka waxaa ka sugnaatay inuu yiri: (safafka ragga waxaa ugu wanaagsan kuwa ugu horreeya, waxaana ugu shar badan kuwa ugu dambeeya.

Kuwa haweenkana waxaa ugu wanaagsan kuwa ugu dambeeya, waxaana ugu shar badan kuwa ugu horreeya) waxa uu saa u leeyahayna waa inay kala fogaadaan ragga iyo haweenka aan xalaasha isu ahayn.

Mar buu arkay Rasuulku iyadoo jidki raggii iyo haweenkii is dhexgaleen markaasuu haweenkii ku yiri:(( dib u baxa, xaq uma lihidin inaad jidka dhexda ka martaan e,) markaasay haweenka saxaabadu derbiga isku dhejin jireen iyagoo amarkii fulinaya.

In ay haweenku is asturaan Alle iyo Rasuul baa amray, waxaa uu Alle yiri: (Nabiyow waxaad ku amartaa haweenkaada, gabdhahaad dhashay, iyo haweenka kalee muslimka ah inay jilbaabbadooda isku daboolaan, taasaa u dhow in gobnimadooda la aqoonsado oo aan la dhibaateyn, Allaahna wixii horay u dhacay wuu asturaa, waana mid naxariis badan). Fiiri aayadda 59aad ee suuratul axzaab.

Sidoo kale Alle wuxuu yiri: ( … Haweenka muuminaadka ah ha ku dabooleen hagoogtooda dhuuntooda oo yaanay quruxdooda u muujin waxaan nimankooda ahayn ama aabbayaalkood ama kuwii dhalay nimankooda ama wiilashooda ama nimankoodu wiilashay dhaleen ama iyaga walaalahooda ama wiilasha walaalahaasi sii dhaleen ama wiilasha gabdhaha walaalahoodihi dhaleen ama haweenka muslimka ah …). Suurartulnuur aayadda 31 aad.

Haddii Alle iyo Nabiga wax ka sugnaadaan lagama horkeeno caqli iyo ra'yi.

Bogga Hore